បន្ទាយមានជ័យ៖ ពលរដ្ឋម្នាក់ត្រូវរន្ទះបាញ់បណ្តាលឱ្យរងរបួសធ្ងន់ ខណៈកំពុងឃ្វាលគោនៅវេលាម៉ោង ១៧និង៤០នាទី ល្ងាចថ្ងៃទី៦ ខែមីនា ត្រង់ចំណុចខ្លាគ្រហឹម ស្ថិតក្នុងភូមិស្ពានក្មេង ឃុំភ្នំដី ស្រុកភ្នំស្រុក ខេត្តបន្ទាយមានជ័យ ត្រូវបានក្រុមគ្រួសារបញ្ជូនទៅសង្រ្គោះនៅមន្ទីរពេទ្យបង្អែកភ្នំស្រុក។

ប្រភពពីមន្ត្រីនគរបាលមូលដ្ឋានបានឱ្យដឹងថា ជនរងគ្រោះឈ្មោះជាបុរស អាយុ៦២ឆ្នាំ រស់នៅភូមិត្រពាំងប្រិយ៍ ឃុំភ្នំដី ស្រុកភ្នំស្រុក ខេត្តបន្ទាយមានជ័យ មុនពេលកើតហេតុជនរងគ្រោះខាងលើបានដេញគោទៅឃ្វាលនៅចំណុចខ្លាគ្រហឹម ស្ថិតក្នុងភូមិស្ពានក្មេង ឃុំភ្នំដី ស្រុកភ្នំស្រុក ខេត្តបន្ទាយមានជ័យ ក្រោយមកមានភ្លៀងធ្លាក់ ផ្គររន្ទះ ហើយក៏មានរន្ទះបាញ់ត្រូវជនរងគ្រោះតែម្ដង។

ក្រោយពីបានទទួលព័ត៌មានកម្លាំងប៉ុស្ដិ៍ភ្នំដី សហការជាមួយរដ្ឋបាលឃុំភ្នំដីចុះដល់ផ្ទះជនរងគ្រោះ នឹងបានបញ្ជូលជនរងគ្រោះទៅសង្រ្គោះនៅមន្ទីរពេទ្យបង្អែកភ្នំស្រុក។

ដោយឡែកមួយករណីផ្សេងទៀត នៅវេលាម៉ោង១៥និង៤៥នាទីល្ងាចថ្ងៃដដែលមានករណីភ្លៀងលាយឡំខ្យល់កន្ត្រាក់ បោកបក់បណ្តាលឲ្យផ្ទះពលរដ្ឋចំនួន៥ខ្នង រងការខូចខាតស្រាល និងជង្រុកស្រូវ១ខ្នង (រងការខូចខាតធ្ងន់) ភូមិក្បាលក្របី ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ៕